سحر الابتسامه

[عبدالله الشمري]

لا تبتسم والقلب قبل ابتسامك = يرقص طرب ويغازلك وإيتمنّاك
طيّرت في جو المحبه حمامك = حام ونزل سربه على السدر و الراك
ركزت مابين المحاني حسامك = زدني طعون وضيم مادام يهناك
يرضي غرورك خضعة الراس امامك = يحق لك . زينك ينسّي خطاياك
عينك خطيره يا مصوّب سهامك = من دم عرق القلب حنّيت يمناك
تمثيلك انّي ماخذيت اهتمامك = يمشي على غيري وانا اعرف خفاياك
اقرا بنظراتك معاني كلامك = تظهر حروفه واضحه عن نواياك
هذا برستيجك وهذا نظامك = تقتل وتمشي في جنايز ضحاياك
خمر الهواوي تحت طرقة لثامك = سجّل حضوري حول روعة شفاياك
حاول تجمّل واسقني من مدامك = عمر الهوى فرصه وانا ودّي ارواك
من كثر حبي لك عشقت احترامك = وانت القمر فارق على كل الافلاك
شمعة جبينك . ضحكتك . وانسجامك = كنّك تبشّرني عسى اللاش يفداك
احتار واعجز كيف اوصّف قوامك = دمار شامل يسلب العقل فتّاك
كان انت سالي ما سطا بك هيامك = لومي عليك وياصلك وإيتعدّاك
وان كان محسوبك غلاك ومرامك = أقبل هلا بك وإرخص العمر لرضاك

[قلب معاذ]

عبدالله الشمري جنائن من الأوركيد لحضورك ونص غزلي رائع
سجل إعجابي

أختك أبرار

[يوسف]

دمار شامل يالشمري أبدعت .......كل الشكر لهذا النص الغزلي والقلب الأخضر

قبل العيد القلوب تترقب

حفظك المولى

اخوك يوسف

[الحرف اليماني]

صح لسانك الشمري

[الفيصل]

وان كان محسوبك غلاك ومرامك = أقبل هلا بك وإرخص العمر لرضاك

كل عام وأنت بخير وينعاد عليك بالخير والبركه
أخوك الفيصل