بيني وبين الشاعر الكبير احمد الخالدي
مجارات بيني وبين الشاعر الكبير احمد الخالدي
يقول احمد الخالدي
سر ياقلم وأكتب تقارير وبنود
وأرسل على اللي قد سمعنا سلامه
الطيب يحوي جملة البيض والسود
لو كان من إيران وإلا تهامه
المشكلة وقتي من الشغل محدود
والأنف من شغلي تزايد زكامه
دقيت سلف وجيت ولاأنته بموجود
وأنا غشيم وزاد وقتي أحتدامه
يمك أجي لو به تحاويل وسدود
ناتيك لو الخط زاد إنبرامه
مشتاق للأحساء مع قصر صاهود
والقيصرية قبل يهدم مقامه
وعيونها العذبة لو الدرب مسدود
ورمانها وقاره وحلو وغرامه
وإن جا (نجم) شايب به هموم وسهود
يشفي بعد ربي برجله سقامه
أنا أشهد البسطي له سنين ملهود
والله لاالوم اللي تجرأ ولامه
فعلت خدمة أسمها دوم (موجود)
من شان لامن جيت ملقى ملامه
غالي ولو ماهو نسل عم وجدود
وإليا تباطيته سئلته علامه
والفكر مثله في الهوى كان مشدود
من جامعاته خذت أكبر علامه
ودرب الهوى مافيه يابو هلا فود
بسج لو شفت الغلا من حمامه
يوم الحساب أخاف من رب محمود
وأجي وأنا مجرم بيوم القيامه
أحمد الخالدي
(نجم) عين ماء فيها علاج للروماتيزم ولكبار السن لاأدري عن ماحصل بها الآن إذكرها منذ زمن طويل
رد الشاعر وليد البسطي
يامرحبا إعداد ماهبت النود
للي من الدمام أرسل سلامه
من دار أخو نورة وحنا له جنود
ياجعل ربي دوم يرفع مقامه
يحفظهم الله من حسود ٍ وحاقود
وجعله حكم يبقى ليوم القيامه
في ظلهم حتى البكستان وهنود
يلقون بعد الله خير وسلامه
وأنا الفلاسي ياسي الأصل موجود
برض الحسا من قبل يبين زحامه
يوم القرابه ظلمها صاب الجدود
بدل نهار الكون أسود ظلامه
يامرحبا يالخالدي وفالك العود
والبن الأشقر حاكرين بتمامه
وحليب خلفاتٍ شعل / وضح مع سود
وعلى الصحن زدنا زبيب وادامه
اقرب وترى الدعوة لك اسهود ومهود
عند البساطا لا ابد ماتضامه
وإن كان ماشفتك ترى خلفي أفهود
من صلب راعين الكرم والشهامه
يكفيني الغربه ومع حظ مقرود
لا يزيد همي وأنت راعي فهامه
ترى الحسا دارك من عصور وعهود
يوم العريعر حار بيض النعامه
أنتم حميتوا الدار من قبل بارود
لاجاكم الجايع يقدم طعامه
ويوم المبرز شامخة وقصرصاهود
هي عاصمه لحكمكم يا النشامه
والحب مالي فيه بيت ٍ وعامود
طرقي أنا ياخوك يالله السلامه
وأخاف من شيئين (شاهد ومشهود)
لامن يلفوني بشاشٍ وخامه
أوصيك طيع الرب وأرقى لك سنود
وإياك تنسى شهر ارمضان وصيامه
وليدالبسطي
